സംസ്ഥാനത്ത് നാളെ സൂചനാ ബസ് പണിമുടക്ക്. 22 മുതൽ അനിശ്ചിതകാല സമരം

ന്യൂസ് ഡെസ്ക് | സംസ്ഥാനത്ത് നാളെ സ്വകാര്യ ബസുകൾപണിമുടക്കും. ബസ്സുടമകളുടെ സംയുക്ത സമിതി ഗതാഗത വകുപ്പുമായി നടത്തിയ ചർച്ച പരാജയപ്പെട്ടതിനെത്തുടർന്നാണ് ഈ തീരുമാനം. തങ്ങളുടെ ആവശ്യങ്ങളിൽ തീരുമാനമുണ്ടായില്ലെങ്കിൽ ജൂലൈ 22 മുതൽ അനിശ്ചിതകാലത്തേക്ക് സർവീസുകൾ നിർത്തിവെക്കുമെന്നും സമിതി വ്യക്തമാക്കി.
140 കിലോമീറ്ററിൽ അധികം ദൂരം സർവീസ് നടത്തുന്ന സ്വകാര്യ ബസുകളുടെ പെർമിറ്റ് പുതുക്കി നൽകാത്തതിനാൽ നിരവധിപ്പേർക്ക് തൊഴിൽ നഷ്ടപ്പെട്ടെന്നും ഈ സ്ഥിതിക്ക് മാറ്റം വരണമെന്നും ബസുടമകൾ ആവശ്യപ്പെടുന്നു. വിദ്യാർത്ഥികളുടെ യാത്രാനിരക്കിൽ കാലോചിതമായ വർദ്ധനവ് നടപ്പിലാക്കുകയും കൺസഷൻ കാർഡ് വിതരണം കുറ്റമറ്റതാക്കുകയും വേണം. കൂടാതെ, ബസ്സുടമകളിൽ നിന്ന് അമിതമായി പിഴ ഈടാക്കുന്ന നടപടികൾ അവസാനിപ്പിക്കുകയും അശാസ്ത്രീയമായ സാമ്പത്തിക ബാധ്യതകൾ വരുത്തുന്ന തീരുമാനങ്ങൾ പിൻവലിക്കുകയും ചെയ്യണം. ബസ് ജീവനക്കാർക്ക് പോലീസ് ക്ലിയറൻസ് സർട്ടിഫിക്കറ്റ് നൽകണമെന്ന വ്യവസ്ഥ ഒഴിവാക്കണമെന്നും സമിതി ആവശ്യപ്പെട്ടിട്ടുണ്ട്.