മാനാഞ്ചിറ – മലാപ്പറമ്പ് റോഡ് വികസനം: പണി അതിവേഗം; എരഞ്ഞിപ്പാലം മേൽപ്പാലത്തിന് പദ്ധതി

കോഴിക്കോട് | നഗരവികസന പാത പദ്ധതിയുടെ ഭാഗമായുള്ള മാനാഞ്ചിറ – മലാപ്പറമ്പ് റോഡ് നവീകരണം അതിവേഗം പുരോഗമിക്കുന്നു. കഴിഞ്ഞ മാസം 16-ന് മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്ത 5.32 കിലോമീറ്റർ ദൈർഘ്യമുള്ള ഈ നാലുവരിപ്പാതയുടെ പണി 2026 ഫെബ്രുവരിക്കുള്ളിൽ പൂർത്തിയാക്കാനാണ് ലക്ഷ്യമിടുന്നതെങ്കിലും, പ്രഖ്യാപിത സമയപരിധിക്ക് മുൻപേ തീർക്കാൻ പിഡബ്ല്യുഡി നിർദേശം നൽകിയിട്ടുണ്ട്. നിർമ്മാണം ആരംഭിച്ച് 20 ദിവസത്തിനുള്ളിൽത്തന്നെ കാര്യമായ പുരോഗതിയുണ്ടായിട്ടുണ്ട്. 79.9 കോടി രൂപ ചെലവിൽ നിർമ്മിക്കുന്ന ഈ റോഡിന് ഇരുവശത്തും 8.5 മീറ്റർ വീതിയും നടുവിൽ 2 മീറ്റർ മീഡിയനും ഉണ്ടാകും. കൂടാതെ, ഇരുവശത്തും 2 മീറ്റർ വീതിയിൽ നടപ്പാതയും നിർമ്മിക്കുന്നുണ്ട്. ഈ നടപ്പാതയുടെ അടിയിൽ 1 മീറ്റർ ഓടയും 1 മീറ്റർ കേബിൾ ഡക്ടും ഉൾപ്പെടുത്തും. നടപ്പാതയോട് ചേർന്ന് അരമീറ്റർ വീതിയിൽ മൺപാതയും ഒരുക്കുന്നുണ്ട്, ഈ ഭാഗങ്ങളിലും മീഡിയനിലും പൂക്കളും പുല്ലുകളും നട്ടുപിടിപ്പിച്ച് സൗന്ദര്യവൽക്കരണം നടത്തും.
എരഞ്ഞിപ്പാലം ഒഴികെ മറ്റ് എല്ലാ സ്ഥലങ്ങളിലും ഭൂമി ഏറ്റെടുക്കൽ പൂർത്തിയായി. എരഞ്ഞിപ്പാലത്ത് ഒരു സ്ഥലത്തിന്റെ ഉടമയുമായിട്ടുള്ള കോടതി നടപടികൾ തുടരുന്നതിനാൽ ഈ ഭാഗം ഒഴിവാക്കിയാണ് നിലവിൽ പ്രവൃത്തികൾ നടക്കുന്നത്. മലയാള മനോരമ, ക്രിസ്ത്യൻ കോളേജ് ഭാഗങ്ങളിൽ മണ്ണിന് ഗുണനിലവാരം കുറവായതിനാൽ മറ്റ് സ്ഥലങ്ങളിൽ നിന്ന് മണ്ണ് എത്തിച്ച് റോഡിന് ബലപ്പെടുത്തൽ നടത്തുന്നുണ്ട്. മണ്ണെടുക്കൽ, ഓട നിർമ്മാണം, ഏറ്റെടുത്ത സ്ഥലത്തെ നിർമ്മിതികൾ പൊളിച്ചുമാറ്റൽ, മരം മുറിക്കൽ തുടങ്ങിയ ജോലികൾ തുടരുകയാണ്. റോഡിന്റെ നിർമ്മാണം പൂർത്തിയാകുന്നതോടെ എരഞ്ഞിപ്പാലം ജംഗ്ഷനിൽ മേൽപ്പാലം നിർമ്മിക്കാനുള്ള പദ്ധതികളുമായി പിഡബ്ല്യുഡി മുന്നോട്ട് പോകും. ഏറെ ഗതാഗതത്തിരക്കുള്ള ഈ ജംഗ്ഷനിൽ, എരഞ്ഞിപ്പാലം പോസ്റ്റ് ഓഫീസ് മുതൽ സിവിൽ സ്റ്റേഷന് താഴെയുള്ള ചുള്ളിയോട് റോഡ് ജംഗ്ഷൻ വരെ 30 മീറ്റർ വീതിയുള്ള മേൽപ്പാലമാണ് നിർമ്മിക്കാൻ ഉദ്ദേശിക്കുന്നത്. കോഴിക്കോട് റോഡ് സിറ്റി ഇംപ്രൂവ്മെന്റ് പദ്ധതിയിൽ ഉൾപ്പെടുത്തി മലപ്പുറം മിഡ്‌ലാന്റ് പ്രോജക്ടിനാണ് ഈ നിർമ്മാണത്തിന്റെ കരാർ ലഭിച്ചിരിക്കുന്നത്.